រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម នៅព្រឹកថ្ងៃពុធ ១៣កើត ខែពិសាខ ឆ្នាំមមី អដ្ឋស័ក ព.ស. ២៥៦៩ ត្រូវនឹងថ្ងៃទី២៩ ខែមេសា ឆ្នាំ២០២៦ នាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម បានរៀបចំ «សិក្ខាសាលា ស្តីពី ការបណ្តុះបណ្តាលជនបង្គោលសម្រាប់ផ្សព្វផ្សាយុទ្ធសាស្រ្តប្រាស្រ័យទាក់ទង នៃការផ្លាស់ប្តូរឥរិយាបថក្នុងសង្គម ដើម្បីពង្រឹងការចុះបញ្ជីអត្រានុកូលដ្ឋាននៅកម្ពុជា» ដោយសហការជាមួយអង្គការ Vital Strategies។ សិក្ខាសាលានេះ ប្រព្រឹត្តទៅដោយរលូនក្រោមអធិបតីភាពរបស់ ឯកឧត្តម ឧត្តមសេនីយ៍ទោ ផុន លីវិរៈ អគ្គនាយករង នៃអគ្គនាយកដ្ឋានអត្តសញ្ញាណកម្ម។

ក្នុងពិធីសិក្ខាសាលានេះ ក៏មានការអញ្ជើញចូលរួម ឯកឧត្តម អគ្គនាយករង លោក លោកស្រី ជាប្រធាននាយកដ្ឋាន អនុប្រធាននាយកដ្ឋាន និងមន្ត្រីពាក់ព័ន្ធនៃអគ្គនាយកដ្ឋានអត្តសញ្ញាណកម្ម ព្រមទាំងថ្នាក់ដឹកនាំ និងមន្ត្រីនៃរដ្ឋបាលរាជធានីភ្នំពេញ និងរដ្ឋបាលខណ្ឌ សង្កាត់ និងអង្គការជាតិ អន្តរជាតិ ដែលមានសមាសភាពចូលរួមសរុប៤៦រូប។

ថ្លែងក្នុងឱកាសបើកសិក្ខាសាលានេះ ឯកឧត្តម ឧត្តមសេនីយ៍ទោ ផុន លីវិរៈ អគ្គនាយករង នៃអគ្គនាយកដ្ឋានអត្តសញ្ញាណកម្ម បានលើកឡើងអំពីគោលបំណងនៃសិក្ខាសាលានេះ រួមមាន៖

ទី១. បង្កើនការយល់អំពីសារសំខាន់ការចុះបញ្ជីអត្រានុកូលដ្ឋាន ជាកាតព្វកិច្ចរបស់មនុស្សគ្រប់រូបដែលរស់នៅក្នុងព្រះរាជាណាចក្រកម្ពុជា និងប្រជាពលរដ្ឋខ្មែរដែលរស់នៅបរទេស និងជាមូលដ្ឋានគ្រឹះដ៏សំខាន់ សម្រាប់កំណត់អត្តសញ្ញាណដល់មនុស្សគ្រប់រូប និងធានាការទទួលបានសិទ្ធិព្រមទាំងការប្រើប្រាស់សេវាជាមូលដ្ឋានដោយស្មើភាព ដូចជាការចុះឈ្មោះចូលរៀន សេវាសុខាភិបាល សេវាគាំពារសង្គមជាដើម

ទី២. ពង្រឹង និងកសាងសមត្ថភាពជនបង្គោល (Focal Point) ជាពិសេសរដ្ឋបាលថ្នាក់ក្រោមជាតិ និងអង្គការជាតិ អន្តរជាតិ ដើម្បីផ្សព្វផ្សាយអំពីអត្ថប្រយោជន៍នៃការចុះបញ្ជីអត្រានុកូលដ្ឋានជូនដល់ប្រជាពលរដ្ឋ

ទី៣. រៀបចំផែនការសកម្មភាពក្នុងការដាក់សាកល្បងយុទ្ធសាស្ត្រប្រាស្រ័យទាក់ទង នៃការផ្លាស់ប្តូរឥរិយាបថក្នុងសង្គម ដើម្បីពង្រឹងការចុះបញ្ជីអត្រានុកូលដ្ឋាននៅខណ្ឌពោធិ៍សែនជ័យ និងខណ្ឌច្បារអំពៅ និងការពង្រីកទៅសង្កាត់ផ្សេងទៀត តាមការគ្រោងទុក។

ជារួម សិក្ខាសាលាដែលអគ្គនាយកដ្ឋានអត្តសញ្ញាណកម្មបានរៀបចំនាថ្ងៃនេះ គឺបន្ស៊ីគ្នានឹងផែនការយុទ្ធសាស្ត្ររបស់ក្រសួងមហាផ្ទៃ និងផែនការយុទ្ធសាស្ត្រជាតិស្ដីពីអត្តសញ្ញាណកម្ម (ដំណាក់កាលទី១) ២០១៧-២០២៦ របស់រាជរដ្ឋាភិបាល និង ឈានទៅសម្រេចចក្ខុវិស័យ «មនុស្សគ្រប់រូបត្រូវបានកំណត់អត្តសញ្ញាណ» និងផ្តោតលើការលើកកម្ពស់គុណភាពនៃការផ្តល់សេវាសាធារណៈឱ្យកាន់តែសាមញ្ញ ឆាប់រហ័ស និងទូលំទូលាយ ឆ្លើយតបនឹងតម្រូវការរបស់ប្រជាពលរដ្ឋ។