រាជធានីភ្នំពេញ៖ នៅថ្ងៃអង្គារ ១០កើត ខែជេស្ឋ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២៦ ខែឧសភា ឆ្នាំ២០២៦ លោកជំទាវ ឧត្តមសេនីយ៍ឯក លឹម រស្មី អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមវគ្គបណ្តុះបណ្តាលស្ដីពី ”ការយល់ដឹងអំពីបញ្ហាសុខភាពផ្លូវចិត្ត ការកំណត់អត្តសញ្ញាណជំនាញគ្រប់គ្រងបឋម ការបញ្ជូនបន្ត និងការសហការណ៍”។ វគ្គបណ្ដុះបណ្ដាលនេះ ប្រព្រឹត្ត ក្រោមអធិបតីភាព លោកជំទាវ ឧត្តមសេនីយ៍ឯក ប៉ុណ្ណ សំខាន់ អគ្គលេខាធិការ គ.ជ.ប.ជ និងមានការអញ្ជើញចូលរួមពី ឯកឧត្តម លោកជំទាវ តំណាងក្រសួង ស្ថាប័ននានា ព្រមទាំងលោក លោកស្រី តំណាងអង្គភាព និងអង្គការដៃគូអភិវឌ្ឍពាក់ព័ន្ធផងដែរ។

វគ្គបណ្ដុះបណ្ដាលនេះផ្តោតលើប្រធានបទចំនួន៦ ដូចខាងក្រោម៖

ទី១៖ លើកកម្ពស់ការយល់ដឹងអំពីសុខភាពផ្លូវចិត្ត និងការប៉ះទង្គិចផ្លូវចិត្ត

ទី២៖ ពង្រឹងចំណេះដឹងអំពីសញ្ញា និងអាការៈនៃបញ្ហាសុខភាពផ្លូវចិត្ត

ទី៣៖ បង្កើនជំនាញបឋមក្នុងការឆ្លើយតប និងការគាំទ្រផ្លូវចិត្ត

ទី៤៖ ពង្រឹងការយល់ដឹងអំពីការបញ្ជូនបន្ដ និងប្រព័ន្ធសហការណ៍

ទី៥៖ លើកកម្ពស់ការសហការរវាងភាគីពាក់ព័ន្ធក្នុងការគាំទ្រប្រជាជនរងផលប៉ះទង្គិចផ្លូវចិត្ត និង

ទី៦៖ ស្វែងយល់ពីតម្រូវការ និងបញ្ហាប្រឈមជាក់ស្ដែង ដើម្បីគាំទ្រដល់ការរៀបចំគម្រោង ឬផែនការសកម្មភាពនាពេលអនាគត។