អគ្គនាយកដ្ឋានអត្តសញ្ញាណកម្ម៖ នាព្រឹកថ្ងៃអង្គារ ៩កើត ខែមិគសិរ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែវិច្ឆិកា ឆ្នាំ២០២០ វេលាម៉ោង០៨:៣០នាទីព្រឹក នៅអគ្គនាយកដ្ឋានអត្តសញ្ញាណកម្ម បានរៀបចំកិច្ចប្រជុំផ្សព្វផ្សាយរបាយការណ៍ ស្តីពី លទ្ធផលការងារបញ្ជ្រាបយេនឌ័រនព្វមាស ឆ្នាំ២០២០ របស់អគ្គនាយកដ្ឋានអត្តសញ្ញាណកម្ម ក្រោមអធិបតីភាពលោកជំទាវ ឧត្តមសេនីយ៍ឯក ឌុច ដាណា អនុរដ្ឋលេខាធិការក្រសួងមហាផ្ទៃ។លោកជំទាវ ប្រធានអង្គប្រជុំបានមានប្រសាសន៍ថា កិច្ចប្រជុំនាពេលនេះជាថ្ងៃជួបគ្នាលើកចុងក្រោយផងដែរសម្រាប់លោកជំទាវក្នុងការដឹកនាំក្រុមការងារយេនឌ័រអគ្គនាយកដ្ឋានអត្តសញ្ញាណកម្ម បន្ទាប់ពីលោកជំទាវត្រូវបានត្រាស់បង្គាប់តែងតាំងមុខតំណែងថ្មី។ លោកជំទាវបានរំលឹកអំពីប្រវត្តិ នៃការបង្កើតក្រុមការងារយេនឌ័រអគ្គនាយកដ្ឋានអត្តសញ្ញាណកម្មនិងក្រុមការងារយេនឌ័រ នៃនាយកដ្ឋានចំណុះអគ្គនាយកដ្ឋាន និងបានកោតសរសើរ ព្រមទាំងថ្លែងអំណរគុណជូនចំពោះថ្នាក់ដឹកនាំគ្រប់លំដាប់ថ្នាក់ និងមន្រ្តីទាំងអស់ នៃអគ្គនាយកដ្ឋានអត្តសញ្ញាណកម្ម ជាពិសេស ប្រធាន អនុប្រធាន និងសមាជិកសមាជិកាក្រុមការងារយេនឌ័រ នៃនាយកដ្ឋានចំណុះអគ្គនាយកដ្ឋានទាំងអស់ ដែលបានចូលរួមយ៉ាងសកម្មក្នុងការអនុវត្តការងារបញ្រ្ជាបយេនឌ័រ នាពេលកន្លងមក។ លើសពីនេះ លោកជំទាវបានផ្តាំផ្ញើដល់សមាជិកសមាជិកា នៃអង្គប្រជុំ ត្រូវខិតខំប្រឹងប្រែងព្យាយាមចូលរួមបន្តទៅមុខទៀតលើការងារយេនឌ័រ ការងារជំនាញ និងការគោរពអនុវត្តតាមបទបញ្ជារបស់ថ្នាក់ដឹកនាំ ដោយអនុលោមតាមច្បាប់កំណត់។ ជាចុងក្រោយ លោកជំទាវបានជូនពរដល់សមាជិកសមាជិកា នៃអង្គប្រជុំទាំងអស់ មានសុខភាពល្អ ជោគជ័យគ្រប់ភារកិច្ច និងមានសុភមង្គលគ្រប់ក្រុមគ្រួសារ។កិច្ចប្រជុំបានបញ្ចប់វេលាម៉ោង០៩:៤៥នាទីព្រឹក នាថ្ងៃខែឆ្នាំដដែល ក្រោមបរិយាកាសស្និទ្ធស្នាលក្រៃលែង៕