ឯកឧត្តម ឧត្ដមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងកិច្ចប្រជុំពិភាក្សាអំពីការស្លៀកពាក់ឯកសណ្ឋាន ការពង្រឹងវិន័យ ការអភិវឌ្ឍន៍សមត្ថភាពរបស់មន្រ្តីនគរបាលជាតិ និងការរៀបចំឱ្យមានគ្រូបង្គោលនៅតាមអង្គារភាពនីមួយៗ

នៅរសៀលថ្ងៃសុក្រ ៦កើត ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២០ ខែតុលា ឆ្នាំ២០២៣ ឯកឧត្តម ឧត្ដមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងកិច្ចប្រជុំពិភាក្សាអំពីការស្លៀកពាក់ឯកសណ្ឋាន ការពង្រឹងវិន័យ ការអភិវឌ្ឍន៍សមត្ថភាពរបស់មន្រ្តីនគរបាលជាតិ និងការរៀបចំឱ្យមានគ្រូបង្គោលនៅតាមអង្គារភាពនីមួយៗ ក្រោមអធិបតីភាព ឯកឧត្តម នាយឧត្ដមសេនីយ៍ សាស្រ្តាចារ្យ សេង ផល្លី អគ្គនាយក នៃអគ្គនាយកដ្ឋានធនធានមនុស្ស។

ក្នុងកិច្ចប្រជុំនេះក៏មានការអញ្ជើញចូលរួមពី ឯកឧត្ដម អគ្គនាយករង ឯកឧត្តម តំណាង អគ្គនាយកដ្ឋាននានាចំណុះក្រសួងមហាផ្ទៃ លោកប្រធាននាយកដ្ឋានរដ្ឋបាល សរុប និងលោក លោកស្រីតំណាងអង្គភាពជំនាញពាក់ព័ន្ធជាច្រើនផងដែរ។

នាឱកាសនោះ ឯកឧត្តម នាយឧត្តមសេនីយ៍ សាស្ត្រាចារ្យ សេង ផល្លី បានមានប្រសាសន៍ថា ដោយទទួលបានការឯកភាពដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឱ្យអគ្គនាយកដ្ឋានធនធានមនុស្ស រៀបចំយន្តការធ្វើកំណែទម្រង់ពង្រឹងកងកម្លាំងនគរបាលជាតិ។

ឯកឧត្ដម នាយឧត្តមសេនីយ៍ បន្ដថា ទាក់ទងទៅនឹងកិច្ចប្រជុំ នៃការធ្វើកំណែទម្រង់នៅក្នុងថ្ងៃនេះ យើងបានលើកយកនូវកម្មវត្ថុ ដើម្បីយកមកជជែកវែកញែក និងប្រមូលផ្ដុំធាតុចូលសម្រាប់ដាក់ចេញនូវផែនការសម្រាប់កំណែទម្រង់ក្នុងការពង្រឹងវិន័យរបស់កងកម្លាំងនគរបាលជាតិចំនួន០៤សំខាន់ៗរួមមាន៖ ទី១. ការស្លៀកពាក់ឯកសណ្ឋាន និងការពង្រឹងវិន័យ, ទី២. កាអភិវឌ្ឍសមត្ថភាពមន្ត្រីរាជការទាំង០៣ក្របខណ្ឌ (មន្រ្តីរាជការស៊ីវិល, នគរបាលជាតិ និងពន្ធនាគារ), ទី៣. ការរៀបចំឱ្យមានគ្រូបង្គោលទៅតាមអង្គភាពនីមួយៗ និងទី៤. បញ្ហាពាក់ព័ន្ធក្នុងការខ្ចីមន្ត្រីយកទៅប្រើប្រាស់៕