រាជធានីភ្នំពេញ៖ នៅយប់ថ្ងៃចន្ទ ៥កើត ខែចេត្រ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី២៣ ខែមីនា ឆ្នាំ២០២៦ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងពិធីពិសារអាហារសាមគ្គីជាមួយថ្នាក់ដឹកនាំក្រសួងមហាផ្ទៃ ក្រសួងសុខាភិបាល ក្រសួងផែនការ និងនាយកអង្គការ Vital Strategies ព្រមទាំងសហការី ក្នុងឱកាសអបអរសាទរខួប១០ឆ្នាំ នៃកិច្ចសហប្រតិបត្តិការលើការងារកែលម្អ និងធ្វើទំនើបកម្មប្រព័ន្ធចុះបញ្ជីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មនៅកម្ពុជា។ ក្នុងពិធីនេះ ក៏មានការអញ្ជើញចូលរួមពី ឯកឧត្តម ប៉ាវ ហម ផាន រដ្ឋលេខាធិការ ក្រសួងមហាផ្ទៃ ទទួលបន្ទុកការងារអគ្គនាយកដ្ឋានអត្តសញ្ញាណកម្ម និងជាអនុប្រធានគ.ជ.ដ.អ. ឯកឧត្តម បានលើកឡើងអំពីសមិទ្ធផលជាច្រើនដែលគ.ជ.ដ.អ. សម្រេចបានក្នុងកិច្ចសហការយ៉ាងជិតស្និទ្ធ ជាមួយអង្គការ Vital Strategies អស់រយៈពេលមួយទសវត្សរ៍នេះ គិតពីឆ្នាំ២០១៧ រហូតដល់បច្ចុប្បន្ន។ ឯកឧត្តម ក៏បានលើកឡើងអំពីកិច្ចសហការនាពេលអនាគតរវាងក្រសួងទាំង៣ និងអង្គការ Vital Strategies ធានាយ៉ាងណាឱ្យកម្ពុជាសម្រេចបានចក្ខុវិស័យ “មនុស្សគ្រប់ត្រូវបានកំណត់អត្តសញ្ញាណ” និង“បុគ្គលម្នាក់មានអត្តសញ្ញាណតែមួយ” តាមរយៈការបង្កើនអត្រាចុះបញ្ជីអត្រានុកូលដ្ឋាន។

ក្នុងពិធីនេះ ក៏មានការអញ្ជើញចូលរួមពី ថ្នាក់ដឹកនាំ ក្រសួងមហាផ្ទៃ ក្រសួងសុខាភិបាល និងក្រសួងផែនការ ព្រមទាំងលោក លោកស្រីជាក្រុមការងារអង្គការ Vital Strategies ប្រចាំតំបន់អាស៊ី និងប៉ាស៊ីហ្វិក ផងដែរ។