សាលារាជធានីភ្នំពេញ៖ តាមរយៈការដាក់ឱ្យអនុវត្តប្រកាសលេខ៣០៦៨ ប្រ.ក ចុះថ្ងៃទី២៥ ខែមីនា ឆ្នាំ២០២៦ របស់ក្រសួងមហាផ្ទៃ ស្តីពីការងារចុះបញ្ជីអត្រានុកូលដ្ឋានតាមប្រព័ន្ធអេឡិចត្រូនិច និងដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី១ ខែមេសា ឆ្នាំ២០២៦ អគ្គនាយកដ្ឋានអត្តសញ្ញាណកម្ម បានសហការជាមួយរដ្ឋបាលរាជធានីភ្នំពេញ ក្នុងការដាក់ដំណើរការប្រព័ន្ធចុះបញ្ជីអត្រានុកូលដ្ឋាន (Civil Registration System – CRS)។ ការចុះបញ្ជីអត្រានុកូលដ្ឋានតាមប្រព័ន្ធអេឡិចត្រូនិចនេះ មានគោលបំណងក្នុងការកែលម្អប្រព័ន្ធចុះបញ្ជីអត្រានុកូលដ្ឋាន និងបង្កើនអត្រានៃការចុះបញ្ជីអត្រានុកូលដ្ឋាន។ ក្នុងពិធីនេះ ឯកឧត្តម ឧត្តមសេនីយ៍ទោ ហេង ចំរើន អគ្គនាយករង តំណាង ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញជាសហអធិបតីជាមួយឯកឧត្តម ឆាយ វីរៈ អភិបាលរង នៃគណៈអភិបាលរាជធានីភ្នំពេញ តំណាង ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ព្រមទាំងថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានអត្តសញ្ញាណកម្ម និងថ្នាក់ដឹកនាំ និងមន្ត្រីជំនាញ នៃរដ្ឋបាលរាជធានីភ្នំពេញ ព្រមទាំងតំណាងអង្គការ Vita Strategies, Plan International Cambodia, UNHCR, UNFPA និងអង្គការ CPDD ផងដែរ។

ប្រព័ន្ធចុះបញ្ជីអត្រានុកូលដ្ឋាន គឺជាប្រព័ន្ធមួយដែលធានានូវការចុះបញ្ជីកំណើត មរណភាព ឱ្យមានលក្ខណៈជាសកល ជាប់លាប់ និងអចិន្ត្រៃយ៍។ ជាមួយគ្នានេះដែរ ប្រព័ន្ធ CRS ក៏បានធ្វើអន្តរប្រតិបត្តិជាមួយប្រព័ន្ធទិន្នន័យសុខាភិបាលឌីជីថល (NCOD) របស់មូលដ្ឋានសុខាភិបាលក្នុងការជូនដំណឹងអំពីព្រឹត្តិការណ៍កំណើតរស់ និងមរណភាពផងដែរ ដើម្បីឱ្យការចុះបញ្ជីបានទាន់ពេលវេលា។ ការដាក់ដំណើរការប្រព័ន្ធនេះ នៅខណ្ឌពោធិ៍សែនជ័យ និងខណ្ឌច្បារអំពៅ គឺជាការអនុវត្តការងារស្របតាមគោលបំណងយុទ្ធសាស្ត្រទី១ និងទី២ នៃផែនការយុទ្ធសាស្ត្រជាតិស្ដីពីអត្តសញ្ញាណកម្ម (ដំណាក់កាលទី១) ២០១៧-២០២៦ ដើម្បីធ្វើការវាយតម្លៃប្រព័ន្ធ CRS លើចំណុចខ្លាំង និងចំណុចដែលត្រូវកែលម្អបន្ថែមមុននឹងដាក់ដំណើរការនៅទូទាំងសង្កាត់ នៃភូមិសាស្ត្រ រាជធានីភ្នំពេញ នៅក្នុងត្រីមាសទី៣ ឆ្នាំ២០២៦ខាងមុខនេះ។